ਪਤਨੀ ਤੇ ਭਾਬੀ ਨੇ ਪ੍ਰੇਮੀ ਨਾਲ ਮਿਲ ਕੇ ਕੀਤੀ ਸੀ ਰਾਜੇਸ਼ ਦੀ ਹੱਤਿਆ, ਸੂਏ ਨਾਲ ਢਿੱਡ 'ਚ ਕੀਤੇ ਸੀ ਵਾਰ, ਪੰਜ ਗ੍ਰਿਫ਼ਤਾਰ

 

 ਸ੍ਰੀ ਮੁਕਤਸਰ ਸਾਹਿਬ : ਪਿੰਡ ਕੋਟਭਾਈ ਵਿਖੇ ਇਕ ਦੁਕਾਨਦਾਰ ਦਾ ਬੀਤੇ ਦਿਨੀਂ ਬਰਫ਼ ਵਾਲਾ ਸੂਆ ਮਾਰ ਕੇ ਬੇਰਹਿਮੀ ਨਾਲ ਕਤਲ ਕੀਤੇ ਜਾਣ ਦੇ ਮਾਮਲੇ ’ਚ ਪੁਲਿਸ ਵੱਲੋਂ ਪੰਜ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਸ ਸਬੰਧੀ ਇੱਥੇ ਪ੍ਰੈਸ ਕਾਨਫਰੰਸ ਦੌਰਾਨ ਜ਼ਿਲ੍ਹਾ ਪੁਲਿਸ ਮੁੱਖੀ ਡਾ. ਅਖਿਲ ਚੌਧਰੀ ਸ੍ਰੀ ਮੁਕਤਸਰ ਸਾਹਿਬ ਨੇ ਦੱਸਿਆ ਕਿ 2 ਅਪ੍ਰੈਲ 2025 ਨੂੰ ਸਵੇਰੇ 8:00 ਵਜੇ ਕੋਟਭਾਈ ’ਚ ਇਕ ਦੁਕਾਨਦਾਰ ਰਾਜੇਸ਼ ਕੁਮਾਰ ਉਰਫ਼ ਕਾਲੀ (ਪੁੱਤਰ ਟੇਕ ਚੰਦ) ਦੀ ਨਿਰਦਈ ਤਰੀਕੇ ਨਾਲ ਕਤਲ ਹੋਣ ਦੀ ਖ਼ਬਰ ਮਿਲੀ ਸੀ। ਸ਼ੁਰੂਆਤੀ ਜਾਂਚ ’ਚ ਪਤਾ ਲੱਗਾ ਕਿ ਉਸ ਦਾ ਕਤਲ ਬਰਫ਼ ਤੋੜਣ ਵਾਲੇ ਸੰਦ (ਆਈਸ ਪਿਕ) ਨਾਲ ਪੇਟ ਤੇ ਗਲ਼ੇ ’ਚ ਵਾਰ ਕਰਕੇ ਕੀਤਾ ਗਿਆ। ਇਸ ਸਬੰਧੀ ਪੁਲਿਸ ਨੇ ਥਾਣਾ ਕੋਟਭਾਈ ’ਚ ਕੇਸ ਦਰਜ ਕੀਤਾ। ਐਸਪੀ (ਡੀ.), ਡੀਐਸਪੀ (ਗਿੱਦੜਬਾਹਾ) ਤੇ ਡੀਐਸਪੀ (ਡੀ.) ਦੀ ਅਗਵਾਈ ’ਚ ਪੁਲਿਸ ਟੀਮਾਂ ਨੇ ਤੁਰੰਤ ਕਾਰਵਾਈ ਕਰਦੇ ਹੋਏ ਤਕਨੀਕੀ ਸਰਵੇਲਾਂਸ ਤੇ ਮਨੁੱਖੀ ਖੁਫੀਆ ਜਾਣਕਾਰੀ ਰਾਹੀਂ ਮੁਲਜ਼ਮਾਂ ਦੇ ਭੱਜਣ ਦੇ ਰਾਹ ਦੀ ਪਛਾਣ ਕੀਤੀ। ਜ਼ਬਰਦਸਤ ਯੋਜਨਾ ਅਧੀਨ 48 ਘੰਟਿਆਂ ਦੇ ਅੰਦਰ ਪੁਲਿਸ ਨੇ 5 ਮੁੱਖ ਮੁਲਜ਼ਮਾਂ ਸੁਖਵੀਰ ਸਿੰਘ @ ਸੁੱਖਾ ਪੁੱਤਰ ਗੁਰਚੰਦ ਸਿੰਘ ਨਿਵਾਸੀ ਕੋਟਭਾਈ, ਨਵਦੀਪ ਸਿੰਘ @ ਲਵੀ ਪੁੱਤਰ ਚੰਦ ਸਿੰਘ ਨਿਵਾਸੀ ਕੋਟਭਾਈ, ਤਰਸੇਮ ਸਿੰਘ @ ਸੇਮਾ ਪੁੱਤਰ ਜਰਨੈਲ ਸਿੰਘ ਨਿਵਾਸੀ ਪਿੰਡ ਦੇਸੂ ਮਾਜਰਾ ਜ਼ਿਲ੍ਹਾ ਸਿਰਸਾ ਹਰਿਆਣਾ, ਰਾਜਨੀ, (ਮ੍ਰਿਤਕ ਦੀ ਦੂਜੀ ਪਤਨੀ) ਨਿਵਾਸੀ ਕੋਟਭਾਈ ਪਿੰਕੀ, (ਮ੍ਰਿਤਕ ਦੀ ਸਾਲੀ) ਨਿਵਾਸੀ ਕਰਨਾਲ ਨੂੰ ਗ੍ਰਿਫਤਾਰ ਕਰ ਲਿਆ। ਮੁਲਜ਼ਮ ਸੁਖਵੀਰ, ਨਵਦੀਪ ਤੇ ਤਰਸੇਮ ਕਤਲ ਤੋਂ ਪਹਿਲਾਂ ਮ੍ਰਿਤਕ ਦੇ ਘਰ ਦੀ ਛੱਤ ਤੇ ਓਹਲੇ ਹੋਏ ਸੀ। ਜਦੋਂ ਰਾਜੇਸ਼ ਕੁਮਾਰ ਘਰ ਪਰਤਿਆ, ਤਦ ਰਜਨੀ ਤੇ ਪਿੰਕੀ ਨੇ ਉਨ੍ਹਾਂ ਨੂੰ ਹੇਠਾਂ ਬੁਲਾਇਆ। ਉਨ੍ਹਾਂ ਸੰਯੁਕਤ ਤੌਰ ਤੇ ਪਹਿਲਾਂ ਤੋਂ ਸੋਚੇ-ਸਮਝੇ ਯੋਜਨਾ ਅਨੁਸਾਰ ਰਾਜੇਸ਼ ਕੁਮਾਰ ਦਾ ਬਰਫ਼ ਤੋੜਣ ਵਾਲੇ ਸੰਦ (ਆਈਸ ਪਿਕ) ਨਾਲ ਨਿਰਦਈ ਤਰੀਕੇ ਨਾਲ ਕਤਲ ਕਰ ਦਿੱਤਾ। ਕਤਲ ਦਾ ਮੁੱਖ ਕਾਰਨ ਰਜਨੀ (ਮ੍ਰਿਤਕ ਦੀ ਪਤਨੀ) ਤੇ ਸੁਖਵੀਰ ਸਿੰਘ ਸੁੱਖਾ ਵਿਚਕਾਰ ਗ਼ੈਰਕਾਨੂੰਨੀ ਸੰਬੰਧ ਸੀ। ਉਥੇ ਹੀ ਪਿੰਕੀ (ਮ੍ਰਿਤਕ ਦੀ ਸਾਲੀ) ਦਾ ਵੀ ਨਵਦੀਪ ਸਿੰਘ ਲਵੀ ਨਾਲ ਗ਼ੈਰਕਾਨੂੰਨੀ ਸੰਬੰਧ ਸੀ। ਰਾਜੇਸ਼ ਕੁਮਾਰ ਉਨ੍ਹਾਂ ਦੇ ਗ਼ੈਰਕਾਨੂੰਨੀ ਸੰਬੰਧਾਂ ਵਿਚ ਰੁਕਾਵਟ ਬਣ ਰਿਹਾ ਸੀ, ਇਸ ਕਰਕੇ ਉਨ੍ਹਾਂ ਨੇ ਮਿਲ ਕੇ ਉਸ ਨੂੰ ਮਾਰਨ ਦੀ ਯੋਜਨਾ ਬਣਾਈ।