ਰੈੱਡ ਕਰਾਸ ਕੰਪਲੈਕਸ ‘ਚ ਹੋ ਰਹੀ ਹੈ ਨਾਜਾਇਜ ਉਸਾਰੀ

 ਨਗਰ ਕੌਸਲ ਦੇ ਛੇ ਕੌਸਲਰਾਂ ਦੇ ਨੋਟਿਸਾਂ ਦੀ ਅਣਦੇਖੀ

ਡਿਪਟੀ ਕਮਿਸਨਰ ਦੇ ਹੁਕਮਾਂ ’ਤੇ ਵੀ ਨਿਸਾਨਦੇਹੀ ਨਹੀਂ ਹੋ ਸਕੀ

ਸ੍ਰੀ ਮੁਕਤਸਰ ਸਾਹਿਬ (BTTNEWS)- ਯਾਦਵਿੰਦਰ ਸਿੰਘ ਕੌਂਸਲਰ ਨੇ ਡਿਪਟੀ ਕਮਿਸਨਰ ਨੂੰ ਪੱਤਰ ਲਿਖ ਕੇ ਮੰਗ ਕੀਤੀ ਹੈ ਕਿ ਰੈੱਡ ਕਰਾਸ ਕੰਪਲੈਕਸ ਵਿੱਚ ਦਸਮੇਸ ਪਿੱਲਰ ਨੇੜੇ ਨਾਜਾਇਜ ਮਾਰਕੀਟ ਦੀ ਉਸਾਰੀ ਚੱਲ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਕੋਟਕਪੂਰਾ ਚੌਕ ਤੋਂ ਰੇਲਵੇ ਸਟੇਸਨ ਤੱਕ ਨਾਜਾਇਜ ਉਸਾਰੀ ਹਟਾਉਣ ਲਈ ਛੇ ਕੌਂਸਲਰਾਂ ਨੇ ਮਿਤੀ 7 ਦਸੰਬਰ 2022 ਨੂੰ ਨੋਟਿਸ ਦਿੱਤਾ ਸੀ, ਜਿਸ ’ਤੇ ਨਗਰ ਕੌਂਸਲ ਨੇ ਮਤਾ ਨੰਬਰ 118 ਮਿਤੀ 23-12-2022  ਪਾਸ ਕਰਕੇ ਡਿਪਟੀ ਕਮਿਸਨਰ ਨੂੰ ਭੇਜ ਦਿੱਤਾ ਸੀ।
ਡਿਪਟੀ ਕਮਿਸਨਰ ਨੇ 14 ਅਪ੍ਰੈਲ 2023 ਨੂੰ ਆਪਣੇ ਪੱਤਰ ਨੰਬਰ 257 ਰਾਹੀਂ ਤਹਿਸੀਲਦਾਰ ਮੁਕਤਸਰ ਨੂੰ ਨਿਸਾਨਦੇਹੀ ਦੇ ਹੁਕਮ ਜਾਰੀ ਕੀਤੇ ਸਨ। ਪਰ ਅੱਜ ਤੱਕ ਨਿਸਾਨਦੇਹੀ ਨਹੀਂ ਹੋ ਸਕੀ। ਉਨ੍ਹਾਂ ਦੱਸਿਆ ਕਿ ਰੈੱਡ ਕਰਾਸ ਦੀ ਇਮਾਰਤ ਦੇ ਗੇਟ ਅਤੇ ਹੋਰ ਖੇਤਰ ਨਿਗਰਾਨੀ ਹੇਠ ਆਉਂਦੇ ਹਨ, ਜਿੱਥੇ ਸੜਕ ’ਤੇ ਨਾਜਾਇਜ ਕਬਜੇ ਹਨ।
ਡਾਕਖਾਨੇ ਦੇ ਬਾਹਰ ਦਸਮੇਸ ਥੰਮ੍ਹ ਦੇ ਆਲੇ-ਦੁਆਲੇ ਮਾਰਕੀਟ ਦੀਆਂ ਦੁਕਾਨਾਂ ਬੀਐਂਡਆਰ ਵਿਭਾਗ ਨੂੰ ਫੰਡ ਜਮ੍ਹਾਂ ਕਰਵਾ ਕੇ ਬਣਾਈਆਂ ਜਾ ਰਹੀਆਂ ਹਨ। ਇਹ ਜਗ੍ਹਾ ਖਸਰਾ ਨੰਬਰ 1013 ਨਿੱਜੀ ਮਾਲਕਾਂ ਦੀ ਜਾਇਦਾਦ ਹੈ ਅਤੇ ਖਸਰਾ ਨੰਬਰ 1014 ਨਗਰ ਕੌਂਸਲ ਦੇ ਟਾਂਗਾ ਸਟੈਂਡ ਅਤੇ ਸੜਕ ਦੀ ਜਗ੍ਹਾ ਹੈ।
ਇਹ ਉਸਾਰੀ ਬਿਨਾਂ ਨਕਸਾ ਪਾਸ ਕਰਵਾਏ ਹੀ ਕੀਤੀ ਜਾ ਰਹੀ ਹੈ। ਜੋ ਕਿ ਪੂਰੀ ਤਰ੍ਹਾਂ ਗੈਰ-ਕਾਨੂੰਨੀ ਹੈ। ਇਸ ਸਬੰਧੀ ਮਾਰਕ ਕਰਨ ਲਈ ਤਹਿਸੀਲਦਾਰ ਸ੍ਰੀ ਮੁਕਤਸਰ ਸਾਹਿਬ ਨੂੰ ਕਾਨੂੰਨੀ ਨੋਟਿਸ ਭੇਜਿਆ ਗਿਆ ਹੈ। ਜਿਸ ਨੂੰ ਲਾਗੂ ਕਰਨਾ ਅਜੇ ਬਾਕੀ ਹੈ। ਉਨ੍ਹਾਂ ਮੰਗ ਕੀਤੀ ਹੈ ਕਿ ਦਸਮੇਸ ਥੰਮ/ਲਾਟ ਦੀ ਧਾਰਮਿਕ ਮਹੱਤਤਾ ਨੂੰ ਬਰਕਰਾਰ ਰੱਖਿਆ ਜਾਵੇ ਅਤੇ ਸਾਰੇ ਵਿਭਾਗਾਂ ਨੂੰ ਕੋਈ ਸੰਕੇਤ ਨਾ ਮਿਲਣ ਤੱਕ ਉਸਾਰੀ ਦਾ ਕੰਮ ਬੰਦ ਕਰ ਦੇਣਾ ਚਾਹੀਦਾ ਹੈ।